Tokio, peshku u shit për 257 mijë euro

Një ton i kuq është shitur për 36,04 milionë jen, rreth 257 000 euro në ankandin tradicional të vitit në tregun e peshkut Toyosu, në Tokio të Japonisë. Peshku peshonte 212 kilogramë dhe çmimi i tij ishte më shumë se dyfishi i rekordit të paguar vitin e kaluar për një ton të kuq, i cili ishte 16,88 milionë jen. Përveç kësaj, ishte shuma e gjashtë më e lartë e paguar ndonjëherë në tregun e shitjes me shumicë të Tokios që nga viti 1999. Në Japoni është e zakonshme që disa lloje peshqish të shiten me këto shifra të larta. Ky vend është një nga konsumatorët më të mëdhenj të peshkut në botë.