Turqia do të inkurajojë një milion refugjatë sirianë të kthehen në shtëpi

Presidenti turk Rexhep Tajip Erdogan tha sot se Ankaraja po përgatit një projekt të ri që do të mundësonte kthimin vullnetar të një milion refugjatëve sirianë në vendin e tyre. Turqia do të inkurajojë refugjatët duke u ndërtuar atyre strehim dhe infrastrukturë lokale. Tani në vend jetojnë rreth 3.6 milionë refugjatë sirianë, të cilët ikën atje pas shpërthimit të luftës civile të vitit 2011 në Siri.

Erdogan njoftoi projektin e ri në ceremoninë e inaugurimit të shtëpive të reja të ndërtuara në Idlib në veri të Sirisë. Ai mori pjesë në ceremoni përmes një video lidhje. Presidenti turk po përballet me zemërimin e publikut  për praninë e refugjatëve dhe është i kujdesshëm ndaj zgjedhjeve parlamentare dhe presidenciale vitin e ardhshëm.

Ai tha se “që kur Turqia nisi operacionet e saj ndërkufitare në vitin 2016, rreth 500,000 sirianë janë kthyer në zonat e sigurisë në Sirinë veriore”.

Sipas projektit, përveç ndërtimit të shtëpive, Turqia do të ndihmojë gjithashtu në ndërtimin e shkollave dhe spitaleve për t’u shërbyer të kthyerve dhe do të ndihmojë në sigurimin e infrastrukturës së nevojshme për ekonominë vendase, “nga bujqësia në industri”.

Të paktën 100,000 shtëpi pritet të jenë gati deri në fund të vitit 2022.

Turqia ka pranuar afro pesë milionë refugjatë nga Siria dhe Afganistani, por prania e tyre ka ngjallur pakënaqësi në mesin e vendasve, veçanërisht pasi vendi pësoi një krizë ekonomike verën e kaluar.