Weinstein thyen heshtjen nga burgu për Brodyn që ia përmendi fëmijët në Oscar

Gjatë fjalimit të pranimit të çmimit “Oscar” për “Aktorin më të mirë” për rolin në filmin “The Brutalist”, aktori Adrien Brody ka falënderuar partneren e tij, Georgina Chapman, si dhe fëmijët e saj me ish-bashkëshortin Harvey Weinstein, India dhe Dash.

“E ndaj këtë çmim me partneren time të mrekullueshme, Georgina, e cila jo vetëm që ka rigjallëruar ndjenjën time të vetëvlerësimit, por edhe vlerat e mia, dhe fëmijët e saj të bukur, Dash dhe India. E di që ka qenë një rrugëtim i vështirë, por ju falënderoj që më pranuat në jetën tuaj”, ka thënë Brody gjatë fjalimit.

FJALIMI I BRODYT:

Pas këtyre komenteve, një përfaqësues i Harvey Weinsteinit, i cili aktualisht vuan dënimin në burgun Rikers Island në New York, reagoi përmes një deklarate për Entertainment Weekly.

“Harvey është i lumtur për Georginan dhe mirënjohës që fëmijët e tij po marrin dashurinë dhe kujdesin që meritojnë”, u shpreh përfaqësuesi i tij.

Një moment i pazakontë në skenë

Fjalimi i Brodyt u bë më i gjati në historinë e çmimeve Oscar, duke përfshirë si momente personale, ashtu edhe profesionale.

Në një gjest të pazakontë, gjatë ngjitjes në skenë për të marrë çmimin, Brody hodhi çamçakëzin e tij drejt Chapmanit, një moment që tërhoqi vëmendjen e publikut.

“Ishte çamçakëz! Sepse harrova që po e përtypja dhe nuk mund të mbaja një fjalim falënderimi duke përtypur”, sqaroi Brody të nesërmen në emisionin Live With Kelly and Mark.

Kur moderatori Mark Consuelos e pyeti pse nuk e kishte gëlltitur, Brody u përgjigj me humor: “Nuk e mendova atëherë! Thjesht mendova që duhej të shpëtoja prej tij sa më shpejt”.

Historia e marrëdhënies së Chapmanit dhe Brodyt

Georgina Chapman, 48 vjeç, e cila u martua me Harvey Weinsteinin në vitin 2007, finalizoi divorcin e tyre në vitin 2021, pas akuzave për sulme seksuale ndaj producentit të njohur.

Brody dhe Chapman nisën lidhjen në vitin 2020 dhe kanë qenë së bashku prej atëherë.

Fitorja e Brodyt të dielën ishte Oscari i tij i dytë, pas çmimit që fitoi në vitin 2002 për interpretimin në filmin “The Pianist”.