По урнек на функционерите, студентите бараат 78% повеќе пари за оброк
Студентите бараат зголемување за 78% на финансиската помош за студентски оброк. Велат дека додека тие чекаат законско решение за покачување на стипендијата од 20 денари, пратениците и другите избрани и именувани функционери си добија повисоки плати за 78%.
Студентите ги обвинуваат партиите дека пребрзо се договараат за нивните интереси, а студентските и младинските политики воопшто не се приоритет за државните институции.
„Факт е дека кога се разговара на овие теми, сите политички партии се караат кој повеќе политички поени ќе добие од овие теми, а кога се зборува за зголемување на платите на пратениците и функционерите, сите политички партии се согласуваат и промените се прават за една вечер. Ова е уште една работа која потврдува дека нема многу надеж за младите во државава бидејќи тие воопшто не им се приоритет на државните институции“, рече Бленди Ходаи, Форум за промени во образованието.
Со предлог-измените кои се во собраниска процедура, се предвидува долгорочно решение за студентските оброци преку картички што ќе им бидат обезбедени.
Моментално државата издвојува по 140 денари дневна субвенција за студентски оброк.
Ајнур Бафќари
