Не даде резултат одлуката на Владата за замрзнување на цените на овошјето и зеленчукот

Се намалија цените на овошјето и зеленчукот за граѓаните да може да купат повеќе производи за верските празници, но си останаа со празни раце. Низ маркетите и денеска рафтовите беа празни. Не биле направени доволно нарачки, ниту за 70% од прометот од претходните месеци. Има само скап зеленчук. Домати кои чинат и до 279 денари има доволно, но домати по замрзнати цени од 95 денари никаде не може да се најдат или се продаваат скапани. Краставици и други земјоделски култури по замрзнати цени не може да се најдат во маркетите, туку само на зелените пазари, каде се продаваат скапо. Граѓаните мора да купуваат на парче.

Advertisements

Зелените пазари имаат сè, но речиси ништо нема по замрзнати цени. Дел од граѓаните велат дека трговците не водат сметка дали има или нема верски празници, туку само ги интересира ќарот.

Од Пазарниот инспекторат велат дека и за време на празниците ќе имаат екипи. Според нивниот последен извештај, 22 фирми биле казнети со вкупна глоба од 1,3 милиони денари. Но, од 650-тте контроли извршени месецов, инспекторите не кажуваат колку од нив биле направени на зелените пазари.

Аднан Ќаили