Државата затвора 5 центри за услуги, отвора 333 нови на друго место

Канцелариите „Еден пункт за услуги“ лоцирани во Скопје, Куманово, Охрид, Битола и Тетово, кои во 2019 година со голема помпозност ги претстави поранешниот министер за информатичко општество и администрација, Дамјан Манчевски, ќе бидат затворени. Немало интерес кај граѓаните да бараат нешто оттаму. За една година во сите 5 центри на граѓаните им биле дадени само 1.062 документи.

Advertisements

Актуелниот министер Азир Алиу најавува дека наместо овие пет центри, државата сега ќе отвора 333 нови шалтери. Но, во канцелариите на Пошта. Ќе ги нудат истите услуги.

„Заедно со Македонска пошта работиме на промена на некои закони, со цел овие услуги да се даваат во секоја канцеларија на Македонска пошта, со што граѓаните ќе можат да ги добиваат услугите на сервисен пункт во секоја канцеларија во Македонски пошти. Тоа се 330 пунктови, од кои сега ќе дисперзираме од 5 на 330 пунктови кои навистина ќе бидат помош за граѓаните“, рече Азир Алиу, министер за информатичко општество и администрација.

На овие шалтери ќе се даваат вкупно 10 услуги од повеќе институции како што се МВР, министерствата за транспорт и врски, труд и социјална политика, Управата за матична книга, Агенцијата за катастар и недвижности, Агенцијата за вработување, Управата за јавни приходи, Фондот за пензиско и инвалидско осигурување, Фондот за здравство и Централниот регистар.

Во моментов се прават законски измени за лицата вработени во Македонска пошта да можат да ги даваат овие услуги. Сето ова се очекува да се заврши за шест месеци.

Според Алиу, оваа реформа не значи дека ќе се намали бројот на вработени во администрацијата која во моментов брои околу 130 илјади.

Инаку, речиси секој министер во ова министерство во првите денови од својата функција презентираше стратешки план за дигитализација на јавните услуги. И покрај тоа, во моментов дури и малиот број услуги кои се добиваат преку Интернет, се соочуваат со голем број проблеми./Алсат.мк

Ардит Рамадани