Ослободен Алил Демири од „Монструм“
Алил Демири, кој вчера беше уапсен од косовската полиција по меѓународната потерница од нашето МВР, денеска беше ослободен. Веста ја потврди неговиот адвокат Бесник Бериша.
„По приложените докази од одбраната и образложените аргументи дадени на рочиштето на кое беше адресирано барањето на Обвинителството за определување мерка притвор, обвинителот кој го застапуваше предлогот, се повлече од барањето. Алил Демири сега е на слобода“, изјави Бериша.
Тој вчера беше убеден дека апсењето на Демири е извршено незаконски и претставува флагрантно кршење на неговите законски и уставни права. Бериша рече дека Демири не може да биде екстрадиран во Македонија бидејќи за барањето веќе било одлучено и било два пати одбиено од косовскиот суд.
Претходно денеска Министерството за правда во Скопје потенцираше дека нема ново барање за екстрадиција на Демири бидејќи барањето од 2018 година е сè уште активно. Алил Демири беше осуден во отсуство на доживотен затвор за случајот „Монструм“, односно за петкратното убиство кај Смилковското езеро пред 11 години.
