Застаре обвинението за „Траекторија“
Падна обвинението за „Траекторја“ против поранешниот премиер Никола Груевски и министерот за транспорт, Миле Јанакиевски, за кинеските автопати Миладиновци-Штип и Кирчово-Охрид. Јавното обвинителство го повлече обвинението поради апсолутна застареност. Судот одлучи да го прекине судењето. Овие одлуки се резултат на измените во Кривичниот законик.
„Земајќи го предвид предлогот на Јавното обвинителство и измените во Кривичниот законик, Судот донесе одлука за укинување на кривичното гонење против обвинетите Владимир Пешевски, Миле Јанакиевски, Љупчо Георгиевски по кривичното дело „злоупотреба на службена должност“ . Се укинува и кривичното гонење против обвинетиот Никола Груевски по кривично дело „примање награда за противзаконито влијание“, рече Илија Трпков, судија.
Обвинението се однесува на изборот на фирмата и пречекорувањето на надлежностите при изборот во проектот за автопатот Миладиновци-Штип и Кичево-Охрид. Штетата врз државниот буџет се проценуваше на 155 милиони евра, а последиците од проектот Кичево-Охрид врз државниот буџет продолжуваат да се зголемуваат поради тоа што автоптатот се уште не е завршен, додека предвидените трошоци се зголемени неколку пати. Судењето за овој случај започна во 2018 година, но никогаш не стигна до фазата на судска одлука.
Адриан Керими
