Дека судството има проблеми покажува и оваа изјава на амбасадорката Агелер
Амбасадорката на САД во Скопје, Ангела Прајс Агелер, во ексклузивна изјава за Алсат за случувањата во Судскиот совет и постапувањето на ова тело во однос на политичките притисоци врз Врховниот суд, истакна дека Советот не успеал во целост да ги исполни неговите законски обврски и оти тоа не е правдата што ја очекуваат жителите на земјава.
„Судскиот совет – теоретски независен орган – ја сноси одлучувачката одговорност за именување квалификувани судии и за дисциплинирање на оние кои не ги исполнуваат највисоките стандарди. Мандатот на Советот е да обезбеди правилно и транспарентно функционирање на судството во оваа земја. Жал ми е што можам да кажам дека видовме малку докази за исполнувањето на овие свети должности. Граѓаните на оваа земја заслужуваат подобро“, наведува Агелер.
Зборувајќи за застарувањето на случајот ТНТ, рече дека очекува Апелациониот суд да биде надлежен за исполнување на неговите законски обврски. Таа додаде дека сè уште нема информации за одлуката на Апелација, но нагласи дека судот мора да одлучи согласно законот.
„Не ја видов одлуката на Апелациониот суд за отфрлање на обвиненијата за случајот ТНТ, но внимателно ќе ја испитаме со надеж дека одлуката ќе биде транспарентна и во согласност со законот“, додава Агелер.
Коментарите на американската амбасадорка доаѓаат неколку дена откако се сретна со претседателката на Врховниот суд, Беса Адеми, која јавно се пожали на политички притисоци врз неа и институцијата, особено по барањето за враќање во сила на аболицијата од 2016 година.
Адријан Керими
