Уставен и годинава почнува целосно неекипиран, приоритет ќе биде воведување „уставна жалба“
И оваа година Уставниот суд ја започна со некомплетен судиски состав поради заглавена процедура во Собранието, и без воведување „уставна жалба“ за граѓаните за полесно остварувањето на нивните права и слободи.
Според претседателката на Уставен суд, Добрила Кацарска иако работеле со помал број судии, успеале да ги надминат и сопствените проекции и во годината што измина да одржат рекорден број на седници – 46, што, како вели таа, не било случај во последните 22 години.
-Овој состав на Уставниот суд по сопствена иицијатива отвори пет предмети само во 2023 година, што е значително висока бројка, ако се земе предвид дека во последните 22 години имало вкупно 12 поведувања на постапки, отворени самоиницијативно, посочи Кацарска во отчетот за минатата година.
Горливо прашање за претседателката на Уставен е воведувањето „уставна жалба“ за граѓаните, за што е потребна амандманска интервенција во Уставот но, како што вели, има недостиг на волја кај политичките партии.
Со воведување „уставна жалба“ секој граѓанин ќе може да ги ужива сите права од Уставот и да бара да му се заштитат пред Уставниот суд кога e сторена повреда, без оглед на политичка, етничка или било која друга припадност, наместо правдата да ја бараат во Судот во Стразбур, нешто што ја чини државата и даночните обврзници парични средства, како и нарушен углед.
