Украинските сили денеска го уништија големиот десантен брод на руската морнарица „Цезар Куников“ во близина на окупираниот полуостров Крим во Црното море, соопшти војската на Киев.
Украински медиум објави неколку видеа на кои се гледа густ чад што се издигнува над морето кај јужниот брег на Крим, како и хеликоптери кои летаат во тоа подрачје.
„Украинските вооружени сили, заедно со разузнавачката единица на Министерството за одбрана, го уништија големиот десантен брод „Цезар Куников“. Тој се наоѓал во украинските територијални води во близина на Алупка во моментот на ударот“, соопшти војската на апликацијата за пораки Телеграм.
Засега нема коментар од Русија, која претходно соопшти дека уништила шест дронови во Црното Море.
Украинската воена разузнавачка агенција соопшти дека рускиот воен брод бил нападнат со поморски дронови.
Украина употреби беспилотни дронови на морнарицата преполни со експлозиви за да ги нападне руските воени бродови за да се обиде да ги избрка од западните делови на Црното Море, овозможувајќи да се отвори бродски коридор долж традиционално клучната извозна рута.
Извор: Reuters
