Откако успеаја да го убедат Чави да остане на тренерската позиција во тимот, „каталонците“ се сега пред нов пресврт, бидејќи членови на Управниот Одбор се свртеа против 44-годишниот стручњак и побараа од Лапорта да го избрка. Причина за тоа се неговите коментари во врска со финансиската состојба во клубот.
„Навивачите на Барселона мораат да сфатат дека ситуацијата е многу комплицирана и тешко е да се натпреваруваме на финансиски план. Сега не е како пред 25 години кога доаѓаше тренер и велеше: го сакам тој, тој и тој играч. Фудбалот не функционира така повеќе. Уште еднаш кажувам дека финансиската ситуација во клубот не е најдобра и сите работиме таа да се подобри“, рече Чави пред натпреварот против Алмерија.
Менаџерите во Барселона сфатиле дека со неговата изјава се лично прозвани дека не си ја вршат својата работа и затоа побарале тренерот да биде избркан, а одредени медиуми во Шпанија тврдат дека Лапорта ја прифатил сугестијата и го известил дека нема да ја води екипата идната сезона.
Од клубот уште нема потврда, но прашање е само кого би донела Барса ако се ослободи од Чави имајќи предвид дека изборот не е голем, а конкурентите веќе на големо ги реализираат плановите за идната сезона.
