Струга Трим Лум загуби со 4-2 од Слован Братислава во првиот меч од воведното квалификациско коло во Лигата на шампионите. Стружани можат да жалат затоа што на пет минути пред крајот имаа одличен резултат 2-2, но две грешки и невнимание во одбраната придонесоа Јурај Куцка да постигне два гола за триумф. Двоен стрелец за Струга ТЛ беше Бесарт Ибраими. Тренерот Ќатип Османи смета дека Струга ТЛ може да одигра уште подобро и да ја надомести негативата на реваншот во Охрид.
„Што се однесува до играта, мислам дека во првото полувреме одлучувачки беа моментите на невнимание во нашата одбрана, кога примивме два гола. Во второто полувреме многу брзо се вративме и мислам дека ја водевме играта на соодветно ниво. На крајот од натпреварот, во 85. минута, примивме трет гол, повторно по индивидуална грешка, а потоа истото се повтори, можеби падна и концентрацијата во тие моменти, што се случува на крајот од натпреварите. Сепак, ние сме оптимисти, мислам дека резултатот 4-2 не е недостижен и ќе направиме сè за да го надоместиме овој резултат“, изјави Ќатип Османи.
„Иако имаме многу силен и квалитетен противник пред нас, кој има и многу квалитетни индивидуални играчи, кои знаат како да го свртат натпреварот во нивна корист, јас реков и порано, ние ќе направиме сè за да ја анулираме предноста на Слован Братислава, бидејќи и ние како екипа покажавме дека имаме сила и квалитет, што ни дава надеж за позитивен резултат“, истакна тренерот на Струга ТЛ.
Капитенот Буњамин Шабани, без сомнение беше еден од најистакнатите фудбалери на натпреварот против Слован Братислава, која во завршницата стигна до триумф од 4-2 против македонскиот првак Струга Трим Лум.
„Жалиме за овој пораз, бидејќи навистина покажавме добра игра, особено во второто полувреме, кога го израмнивме резултатот. Кога помисливме дека ќе стигнеме до нерешен резултат, што истакна и тренерот Ќатип Османи, поради неколку моменти на невнимание примивме два гола. Сепак, мислам дека од ова многу научивме и верувам дека во реваншот ќе играме уште подобро“, изјави капитенот на Струга ТЛ, Буњамин Шабани, кој го одигра својот 11. натпревар во дресот на стружани во рамките на европските натпревари.
Реванш натпреварот меѓу Струга Трим Лум и Слован Братислава е закажан за 17 јули на стадионот „Билјанини извори“ во Охрид, со почеток во 17 часот.
