Експерти: ДУИ, цели 20 години имаше шанса да спроведе ветинг

Партијата на Ахмети беше на власт повеќе од две децении, и овој ветинг што го бара, имала можност да го направи кога ги имаше сите механизми при рака, вели аналитичарот Мухамет Халили. Според него, Македонија е суверена држава и ветингот треба да го сторат самите државни институции. Халили истакна дека меѓународниот фактор постојано укажува дека во земјата преовладува епидемија на корупција , нагласувајќи ја потребата од реформи во судството.

Advertisements

„Ова се само зборови што се слушаат во последните пет години. Македонија е суверена држава и има институции кои го следат криминалот и корупцијата, стабилна и функционална власт која произлезе од волјата на граѓаните. Има гласини и осомничени за криминал и корупција и она што треба да се направи е да се ослободат самите државни институции да работат без политички притисок. Уште повеќе, кога ЕУ има 17 препораки упатени до Македонија во однос на реформите во судството, ништо друго не треба да се направи, работата ќе се заврши. Овие повици се смешни бидејќи ако меѓународната заедница се меша во работите на судството, тогаш Македонија го губи интегритетот на државата, и јас не верувам дека некогаш ќе има меѓународни институции кои ќе одговорат на овој повик, бидејќи ова е мешање во работите на државата”, рече Мухамет Халили, политички аналитичар.

Халили ги коментираше и неодамнешните изјави на премиерот Мицкоски за можни сценарија за дестабилизација од страна на ДУИ. Тој вели дека тенденциите  на ДУИ, за протести или дестабилизација, нема да наидат на поддршка кај населението.

„Протестите се дозволени ако се прават во рамки на Законот и институциите, но ќе го цитирам градоначалникот на Тетово Касами дека ако сметаат дека треба да предизвикаат дестабилизација , Касами им порача дека Албанците повеќе немаат интерес да прават турбуленции поради нечии бизниси. Верувам дека ова е за да се замагли реалната ситуација и ништо друго. Мислам дека нема да има дестабилизација бидејќи граѓаните не  поддржуваат, особено врз основа на минатото дека овие дестабилизации беа чисто за лични и семејни прашања”, изјави Мухамет Халили, политички аналитичар.

ДУИ повторно го актуализираше барањето за ветинг на сите политичари и функционери во последните триесет години. Партијата на Ахмети дури инсистираше овој ветинг да се направи со помош на меѓународната заедница.