Дамева: Специјалната комисија за Рамадани работи интензивно
Претседателката на Судски совет Весна Дамева, информираше дека специјалната комисија што го испитува случајот со бегството од куќен притвор на поранешниот припадник на ОВК Блерим Рамадани, работи интензивно, и како што рече, се очекува час поскоро да излезе со извештај.
Во изјава за медиуми на пауза од денешната седница, Дамева рече дека штом биде констатирана фактичката состојба, веднаш ќе биде ставена на седница.
– Во овој момент не можам да кажам затоа што тоа е во рамки на Комисијата, единствено како претседател на Судски совет, на некој начин ги обезбедувам сите технички услови за да им бидат обезбедени тие податоци кои им се потребни за анализа. Цела постапка околу конкретниот случај, околу одговорност на судии и слично, да не прејудицираме, има законски рокови. Во овој случај ќе се работи интензивно и многу итно, јавноста заслужува одговори час поскоро, рече Дамева.
