Во вторник ќе се знае дали ќе има одговорност за судијата Пајазити
Во вторник ќе се знае дали ќе има одговорност за судијата Пајазити
Судијата Пајазит Пајазити, на поранешниот војник на ОВК, Блерим Рамадани, мерката ефективен притвор му ја заменил со куќен притвор без да даде дополнителни објаснувања за причините, а и не го утврдил начинот на кој полицијата ќе го врши надзорот. Ова е заклучокот на Комисијата на Судскиот совет, која три недели ја испитуваше постапката на Кривичниот суд за Рамадани, откако тој избега од домашен притвор.
Извештајот беше едногласно одобрен од сите членови, но Комисијата не дава препораки што ќе се прави понатаму и дали ќе се бара одговорност од судијата Пајазити, иако сите членови на Советот имаат можност да го сторат тоа. На седницата во вторник ќе може да се расправа за одговорноста на судијата Пајазити, додека еден од членовите на советот, повикувајќи се на извештајот, констатира дека има субјективна одговорност на судијата.
Рамадани беше уапсен на 17 јули на граничниот премин во Јажинце, врз основа на потерница издадена од Србија до Интерпол. Две недели остана во екстрадиционен притвор во Шутка по барање на обвинителството на Ислам Абази, а потоа судијата Пајазит Пајазити мерката ја замени со куќен притвор кој требаше да трае додека Врховниот суд не го даде последниот збор за екстрадицијата. За ова Обвинителството поднесе претставка. За жалбата на обвинителството, постапи Кривичниот совет од тројца судии, кои на 14 август ја укинаа одлуката на Пајазити и ја вратија одлуката Рамадани да се врати во Шутка. Меѓутоа, на истиот датум Рамадани избега. На 23 август, Врховниот суд ја укина одлуката на Судот, барајќи случајот да се суди од почеток, иако Рамадани не е во земјава.
Институциите се уште си ја префрлуваат одговорноста за бегството на Рамадани. Најголем конфликт имаше меѓу Кривичниот суд и полицијата. Судот образложи дека тие не се одговорни за неговото бегство бидејќи во државата има полиција која треба да се грижи за надзорот. Но, од полицијата посочуваат дека Судот направил преседан кога на Рамадани му одредил домашен притвор, на странска адреса, иако тој не бил државјанин на Македонија.
Случајот Рамадани беше причина и за дневно препукување на политичките партии. Опозициската СДСМ обвини дека бегството на Рамадани го направиле полициските структури во земјава и за ова побарала разрешување на министерот за внатрешни работи Панче Тошковски. Сепак, ВМРО-ДПМНЕ бараше одговорност од судот, поради замена на ефективниот притвор со куќен притвор. За ова владејачката партија неколку пати побара да се отповика судијата Пајазит Пајазити, кого премиерот Христијан Мицкоски го нарече омилен судија на СДСМ и ДУИ.
Прашањето за Рамадани предизвика судири и во албанскиот политички блок. Од Демократската унија за интеграција, обвинувајќи ја владејачката коалиција ВЛЕН за неспособност, неколку пати го потенцираа ставот дека со бегството на Рамадани, пропадна планот на Вучиќ и македонската влада да го екстрадираат поранешниот војник на ОВК кој се прогонува по наредба на српската влада. Во меѓувреме, ВЛЕН ја обвини ДУИ дека се обидува да го жртвува Блерим Рамадани за да предизвика тензии и прекин на односите со Косово./Алсат.мк
Суад Бајрами
