Силјановска: Одлуките на Меѓународниот суд на правдата да станат обврзувачки за сите
Силјановска: Одлуките на Меѓународниот суд на правдата да станат обврзувачки за сите
Претседателката Гордана Силјановска Давкова во својот говор на Самитот на Обединетите нации во Њујорк ниту еднаш не го спомена името на државата. Силјановска на Самитот за иднината рече дека е време да се соочиме со грдата реалност на војни, природни катастрофи, екстремна сиромаштија, нееднаквост и кршење на меѓународното право, практикување на правото од страна на народот наместо владеење на правото, жртвување на правдата, етиката и моралот заради профит и моќ. Таа побара длабоки реформи во ОН и одлуките на Меѓународниот суд на правдата да станат обврзувачки за сите.
Албанскиот премиер Еди Рама рече дека одвреме-навреме ОН не можат да ги исполнат надежите на луѓето, стравот за иднината продолжува да расте насекаде, на исток, на запад, на север и на југ.
„Нашите предизвици се длабоко меѓусебно поврзани и ако не се соочиме со нив, со зајакнат мултилатерален поредок сите заедно ќе пропаднеме. Мултилатералната акција не е избор, тоа е итна потреба. Проблемите со кои се соочуваме денес, без разлика дали се резултат на нашите постапки или неактивност, бараат колективни одговори. Албанија целосно го поддржува Пактот за иднината и сите негови заложби, но дозволете ми да нагласам, обврските сами по себе воопшто не се доволни. Тие мора да бидат исполнети, имплементирани“, рече Еди Рама, премиер на Албанија.
Светските лидери на 193 земји во Њујорк усвоија Пакт за иднината кој вклучува Глобален дигитален договор и Декларација за идните генерации. Овој пакт е најобемниот меѓународен договор во последните неколку години, кој опфаќа сосема нови области, како и прашања за кои не е можен договор со децении. Пактот има за цел пред сè да обезбеди меѓународните институции да можат да дадат резултати во услови на променет свет. Пактот опфаќа широк спектар на прашања, вклучувајќи мир и безбедност, одржлив развој, климатски промени, дигитална соработка, човекови права, пол, млади и идни генерации и трансформација на глобалното владеење./Алсат.мк
Фатлуме Дервиши
