Моране, бојкот на настава, родителите бараат независно училиште

Министерството за образование и Министерството за финансии не даваат никакви детали дали пристигнало барање за осамостојување на приградското училиште „Наим Фрашери“ од село Моране. И покрај прашањата упатени од Алсат, досега не добивме никаков одговор дали во овие институции се разгледува постапка за осамостојување на ова училиште. Од друга страна, во училиштето продолжува бојкотот на наставата. Учениците што ги сретнавме во училишниот двор изјавија за Алсат дека ќе се обидат да ги надоместат изгубените часови дома во консултации со наставниците.

Advertisements

„Се чувствував тажно бидејќи не отидов на училиште, но се надевам дека оваа работа ќе биде завршена. Сѐ додека сме во бојкот, ќе учам од дома“, рече еден ученик.

„Многу ни е жал што пропуштивме настава. Пропуштената настава ќе ја учиме дома. Ќе се консултираме со наставниците и родителите. Ќе го искористам времето и ќе ги правам задачите што ми останаа на половина“, додаде друг ученик.

Според иницијативниот совет, наставата се бојкотира, бидејќи не се дозволува осамостојување на училиштето, кое во моментов функционира како приградско училиште на централното училиште во село Студеничани. Според жителите, барањето за осамостојување на училиштето започнало во 2014 година и ги исполнува сите услови за самостојно функционирање на училиштето. Општина Студеничани апелираше до жителите да го прекинат бојкотот бидејќи е штетен за учениците. Градоначалникот Садику, изјави дека барањето за осамостојување на училиштето го доставил до Министерството за образование, каде што надлежната комисија утврдила дека се исполнети условите за осамостојување на овој објект./Алсат.мк

Мелихате Рустеми