Независниот ултрадесничарски кандидат води по првиот круг на претседателските избори во Романија
Независниот ултрадесничарски кандидат Калин Георгеску води со 22,84 отсто по првиот круг на претседателските избори во Романија. Овој резултат, како што пренесуваат тамошните медиуми, е по пребројани 90 отсто од гласовите на вчерашните одржани избори.
Актуелниот премиер и претседателски кандидат на Социјалдемократската партија, Марсел Чолаку, пак, освои 19,24 отсто од гласовите.
Тие двајца треба да се соочат на вториот круг од претседателските избори, кои ќе се одржат на 8 декември.
Медиумите претходно објавија, по преброени 80 отсто од гласовите, дека и двајцата кандидати постигнале изедначен резултат, со по 22,1 отсто од гласовите.
За многумина резултатот на Георгеску е повеќе од изненадувачки. Анкетите не предвидуваа дека десничарскиот политичар ќе влезе во вториот круг на изборите.
Тој се смета за исклучиво религиозен и за националистички настроен. Застапува проруски позиции и го критикуваше членството на Романија во НАТО. Неговата кампања за претседателските избори главно се одвиваше на социјалните мрежи.
На претседателските избори во Романија учествуваа 14 кандидати за функцијата шеф на државата.
На гласање излегле 9,4 милиони луѓе, што е околу 52,4 отсто од гласачите, покажуваат податоците на Централната изборна служба.
Вториот круг на претседателските избори во Романија ќе се одржи на 8 декември.
