Наместо на суд, првиот човек на Струга Рамиз Мерко остана на седницата на Советот на општината
Наместо на суд, првиот човек на Струга Рамиз Мерко остана на седницата на Советот на општината
Градоначалникот на општина Струга, Рамиз Мерко, денеска беше во Советот на Струга, каде што ги придружуваше советниците на Струга, наместо да се појави во Основниот суд во Битола, каде што се одвива судскиот процес за издадената дозвола за изградба на зградата, во хотел овде во градот.
Но, судскиот процес против 11 лица, меѓу кои трето-обвинет е Мерко, кој е на црната листа на САД повеќе од година и пол, е одложен бидејќи адвокатот на еден од обвинетите, поточно сопственикот на хотелот, побара одложување бидејќи денеска беше ангажиран во друг судски процес. На судењето беше одбраната на Мерко.
„Овој предмет е доделен на Основниот суд Битола, поради недоволниот број судии во нашиот суд кои би можеле да постапуваат“, велат од Основен суд Струга.
Станува збор за предмет, кој Обвинителството на Струга го покрена за дивоградба на објект во близина на базен на хотел во Струга. Според обвинението, во мај 2019 година сопственик на фирма поднел барање за реконструкција на базенот, но од Мерко добил дозвола да го изгради целиот објект. Станува збор за кривично дело за кое евентуалната затворска казна е најмалку 3 години.
Во меѓувреме, Мерко денеска доби уште една кривична пријава за „несовесно работење во служба“.
„Тој во својство на градоначалник на општина Струга на 30.05.2018 година и 01.04.2024 година донесе решение со кое А.О. од село Подгорци струшко го именувал од библиотекар за директор на основното училиште од истото село. Обвинетиот Р.М. ова го направил иако знаел дека А.О. нема соодветно образование и не ги исполнува условите од Законот за основно образование, нема најмалку пет години работно искуство во училиште, не положил испит за директор во законскиот рок, нема пракса и не поседува сертификат релевантен за познавање на англискиот јазик“, велат од МВР.
Овие неправилности се констатирани при контрола на Државниот просветен инспектор, на 20.06.2024 година. Веќе има судски спор за Мерко, за ова основно училиште, и за незаконското именување на директор, како и за уште четири училишта. Против Мерко во моментов има 8 активни пријави. Денеска се обидовме да добиеме став од Мерко за новата кривична пријава, но тој не сакаше ништо да коментира./Алсат.мк
Мики Трајковски
