Касами: Процесот на именување на улиците ќе се спроведе со широк консензус

Именувањето на улиците во Тетово ќе се спроведе со широк консензус и со одобрување од членовите на комисиите, за да не се наштети интересот на граѓаните. Градоначалникот на Тетово, Билал Касами, изјави дека сè се одвива во согласност со Законот и дека оваа работа, која не била завршена триесет години, ќе добие епилог оваа година. Касами нагласи дека некои улици во Тетово имаат имиња како „Кавказ“, кои не се поврзани ниту со составот на населението, ниту со албанската, македонската или некоја друга заедница.

Advertisements

„Северна Македонија треба да има европски именувања, и ако сакаме да имаме европска ориентација и идентитет. Постојат многу идеолошки определби од минатото кои, иако изгледаат македонски, немаат никаква врска со македонската заедница и таа ориентација. Верувам дека и самите Македонци, кои се дел од комисијата, ќе бараат да се променат овие имиња. Албанската страна во комисијата во ниту еден момент нема да наметнува имиња поврзани само со албанската заедница. Покажавме добра волја во процесот да бидат вклучени имиња и од други помали заедници, како што се Турците, Ромите и другите заедници“, рече Билал Касами, градоначалник на општина Тетово.

Огранокот на ВМРО во Тетово изрази подготвеност да разговара за имињата на улиците.

„Ние како група советници на ВМРО се согласуваме да разговараме за улици кои немаат имиња, како и за улички кои се само обележани со бројки и тоа само доколку е прифатливо за населението, со почитување на еднаквоста на сите заедници во Тетово, со цел да се реши проблемот со немање куќен број или име на улица, кои се доста бројни во Тетово“, велат од ВМРО- Огранок Тетово.

И шефот на владата Мицкоски рече дека ова прашање треба да се реши со консензус. Со ист став излезе и СДСМ. Во Тетово има вкупно 297 улици, од кои 216 се неименувани и без број. Поради оваа причина, беше формирана комисијата за именување на улиците./Алсат.мк