Во Прага договорени чекори за зајакнување на билатералната соработка со Чешка
Во Прага се одржа Заедничкиот состанок за економска соработка помеѓу Република Македонија и Република Чешка, на која се договорени чекори за продлабочување на билатералната соработка во повеќе сектори, соопшти Министерството за енергетика, рударство и минерални суровини (МЕРМС).
Македонската делегација беше предводена од министерката за енергетика, рударство и минерални суровини, Сања Божиновска, која, како што се наведува во соопштението, активно се залага за зајакнување на економските врски со Чешка и иницира конкретни чекори за привлекување инвестиции и проширување на деловната соработка меѓу двете земји. Вицепремиерот и министер за транспорт и врски Александар Николовски, како и дел од делегацијата претставници од повеќе ресорни министерства, паралелно одржаа работни средби со своите чешки колеги. Разговарано беше за соработка во енергетиката, транспортот, внатрешните и надворешните работи, културата, заштитата на животната средина, земјоделството и други сектори од заемен интерес.
