Забелешката на Инспекторатот не го убеди министерот Минчев да го почитува албанскиот
И покрај забелешката на Инспекторатот за користење на јазиците, Министерството за јавна администрација, кое го води Горан Минчев, продолжува да комуницира со јавноста само на македонски јазик, лишејќи ги граѓаните Албанци од правото на информираност на нивниот мајчин јазик.
Единствените известувања на албански јазик на веб-страницата што ја користи Министерството се информациите од пред девет месеци за примањето на должноста и одбележувањето на Денот на Албанската азбука. Образложението на Минчев е дека сè уште немаат официјална веб-страница, која треба да ја подготви Министерството за дигитална трансформација, додека во моментов соопштенијата и известувањата се објавуваат на веб-страницата на поранешното Министерство за информатичко општество и администрација.
Минчев не се откажува од своето креативно толкување на Законот за употреба на јазиците, иако по пријавата на Алсат, во декември минатата година Инспекторатот утврди дека го прекршил законот, и тоа член 1 став 2 и 3, член 2 став 3, во врска со член 6 став 4, за што доби забелешка.
И покрај тоа што со Законот за употреба на јазиците, институциите се обврзани да комуницираат и на друг јазик кој го зборуваат најмалку 20% од граѓаните, односно албански, министерот Минчев не се откажува од креативните толкувања на законот. Според него, има член во законот кој му дозволува да не го користи албанскиот јазик во институцијата, но комуникациите, на барање на медиумите, може да се преведат.
Сепак, останува нејасно на кој член се повикува министерот, иако неговата изјава е во контрадикција со наодите на Инспекторатот, кои утврдија прекршување на основните одредби на законот.
Суад Бајрами
