Мандатарот му достави на српското Собрание предлогот за нова Влада, седницата за избор закажана за утре

Кандидатот за премиер Ѓуро Мацут денеска до парламентот го доставил предлог-составот на српската влада, вклучувајќи биографии на предложените членови.

Advertisements

За прв вицепремиер и министер за финансии е предложен Синиша Мали, кој досега ја извршуваше оваа функција. Ресорот за внатрешни работи му е доверен на Ивица Дачиќ, кој останува и на вицепремиерската функција. Адријана Месаровиќ е предложена за вицепремиер и министер за економија. Го водеше овој ресор и во владата на Милош Вучевиќ.

Според предлог-составот, Братислав Гашиќ (министер за одбрана), Марко Ѓуриќ (министер за надворешни работи), Дубравка Ѓедовиќ Хандановиќ (министер за рударство и енергетика), Златибор Лончар (министер за здравство), Никола Селаковиќ (министер за култура) и Милан Кркобачиќ треба да ги задржат ресорите.

За нов министер за образование е предложен Дејан Вук Станковиќ. Ресорот евроинтеграции треба да му се довери на Немања Старовиќ, кој во претходната влада раководеше со Министерството за труд. За овој ресор во новата влада е предложена Милица Ѓурѓевиќ-Стаменковиќ, која беше министерка за семејна грижа и демографија во владата на Милош Вучевиќ.

Драган Гламочиќ е предложен за министер за земјоделство, шумарство и водостопанство, Сара Павков за министерка за заштита на животната средина, Јагода Лазаревиќ за министер за внатрешна и надворешна трговија, Ненад Вујиќ за министер за правда, Снежана Пауновиќ за министерка за државна администрација и локална самоуправа,, а Демо Бериш за министер за човекови, малцински права и социјален дијалог.

За министри без ресор се предложени Новица Тончев, Ѓорѓе Миличевиќ, Усаме Зукорлиќ, Ненад Поповиќ и Татјана Мацура.

Српскиот претседател Александар Вучиќ на 6 април му го довери мандатот за формирање на новата влада на ендокринологот и професор на Медицинскиот факултет во Белград, Ѓуро Мацут.