Одбележан 7 мај – Денот на полицијата
Улогата на полициските службеници во одржувањето на јавната безбедност и борбата против криминалот и корупцијата беа во фокус на одбележувањето на 7 мај – денот на полицијата.
Првиот човек на полицијата, Панче Тошковски, рече дека корупцијата е длабоко вгнездена во македонското општество и дека полицијата мора да продолжи со својата улога во искоренување на истата. Тошковски потсети и на некои од позначајните истраги кои се водеа изминатиот период.
„Случајот Адитиви во кој се опфатени 23 лица е симбол на тоа дека нема недопирливи кога се работи за злоупотреба на државни пари и ресурси. Во координирана акција минатиот декември е разбиена една од најопасните криминални структури, чии членови учествувале во повеќе од осум убиства и сериозни закани кон полициски службеници“, рече Тошковски.
На денот на полицијата пак, премиерот Христијан Мицкоски испрати порака дека во оваа држава повеќе нема место за врски, непотизам и заштита од одговорност.
„Имаше време кога институциите се користеа за лични и политички интереси, а не за правда. Пораките ќе средиме и ќе се јавам беа погласни од законот, но тоа време е завршено. Сакам денеска јавно и гласно да кажам – Во оваа држава нема веќе место за врски, непотизам и заштита од одговорност. Законот важи за сите, без разлика дали се работи за обичен граѓанин, функционер или бизнисмен“, рече Мицкоски.
На 7 мај традиционално секоја година се одбележува денот на македонската полиција, кој е посветен на признавањето на работата и посветеноста на полицајците. Годинава, прославата се одржа во Центарот за обука на МВР во Идризи, каде што присуствуваа високи државни функционери.
Михаило Донев
