Ако идејата за бавно, елегантно патување низ пределите на Англија и Велс ви звучи како сон, запознајте го „Британик експлорер“ – новиот луксузен воз од работилницата на познатата марка „Белмонд“ го започнува своето патување на 4 јули 2025 година.
Бавно патување
Од моментот кога ќе стапнете во овој воз на станицата „Лондон Викторија“, јасно е дека не патувате со обично превозно средство. Со елегантни кабини кои повеќе потсетуваат на мали бутик-хотели, ресторан управуван од повеќекратно наградуваниот готвач Сајмон Роган, бар, спа-центар и внимателно дизајнирани патни планови кои ја слават британската природа, култура и гастрономија, „Британик експлорер“ го редефинира терминот „бавно патување“. Три различни маршрути (Корнвол, Лејк Дистрикт и Велс) тргнуваат секоја недела, а постои и опција да се комбинираат две маршрути во едно големо, шестчасовно патување за оние што сакаат уште повеќе од тоа бавно, луксузно патување.
View this post on Instagram
Возот има вкупно 18 кабини, од кои три се големи апартмани – луксузни, пространи и со личен батлер. Другите 15 апартмани се еднакво шармантни, со ентериери инспирирани од британските пејзажи, од тапетите до нијансите на текстилот. Секоја кабина има сопствена бања, а дневната соба лесно се трансформира во ноќна оаза.
„Британик експлорер“ има и велнес-центар, прв од ваков вид во Велика Британија. Во соработка со луксузниот британски бренд „Вајлдсмир скин“, достапни се третмани за лице, масажи и утринска јога, додека возот тивко се движи низ зелените предели. Идеално за ресетирање по градската врева.
Патувањето не запира кога ќе излезете од возот бидејќи секоја маршрута вклучува специјално дизајнирани екскурзии.
Планирањето вакво патување значи ставање на хедонизмот, тишината и визуелната поезија на природата на врвот на листата со приоритети.
