Повеќе од 600 лица сè уште се водат како „фантоми“
Бројот на лица без правен статус во државата останува алармантен. Властите, и покрај препораките од институциите, продолжуваат да ги држат граѓаните без регулиран правен статус. Министерот за социјална политика, демографија и млади, Фатмир Лимани, изјави дека се работи на идентификација и издавање на документи за овие лица, но нагласи дека ова не е прашање што го засега само неговото министерство.
„Проблемот со државјанството не се однесува само на нашето министерство, туку е прашање што ги засега сите останати министерства. Сме во контакт со премиерот и со другите министерства за да се најде што побрзо решение за ова прашање кое не е ново, туку трае со децении“, рече Лимани.
Народниот правобранител смета дека и покрај законските измени со кои се поедноставија и забрзаа процедурите за запишување во матичните книги и издавање на документи, во Македонија сè уште има над 600 лица „фантоми“. Тој нагласи дека голем дел од овие лица се жртва на начинот на функционирање на институциите.
Поради недостиг на евиденција, во 2023 година, едно лице од Скопје останало речиси 10 дена во мртовечница, бидејќи семејството не можело да организира погребна церемонија. Собранието веќе има усвоено пакет законски измени, и тоа во: Законот за лични карти, Законот за матичната евиденција и Законот за пријавување на живеалиште и престојувалиште. Сепак, и покрај нивното донесување, проблемот останува нерешен.
Линда Ебиби
