За жените – раководители во земјава директорски фотелји претежно во градинките
Сериозна родова нееднаквост на лидерските позиции во општините, покажува најновата студија за проектот „Низ женски леќи“ финансиран од ЕУ. Во целата земја нема повеќе од 5 жени градоначалници, додека бројот на раководителики во општинските органи е мал. Жените се директори во повеќето градинки и во секторите за социјална заштита или култура, но малку се во раководењето на основни училишта или во секторите урбанизам и економски развој.
Главниот предизвик со кој се соочуваат жените на лидерските позиции е родовата пристрасност и недостигот на соодветна обука.
Координаторите задолжени за подигнување на родовата свест се соочуваат со финансиски проблеми и посебна систематизација на нивната работа.
„И мажите треба да бидат вклучени затоа што станува збор за еднакви можности, не станува збор само за жени“, вели Беса Зиба, Општина Струга.
„Освен ако не се подобрат капацитетите, сè додека човечкото ниво не сфати дека живееме во 21 век, нема да имаме успех како жени“, рече Мерита Елмази, Општина Теарце.
Координаторите оценуваат дека на земјава ќе ѝ треба време за да постигне родова еднаквост, па затоа, меѓу другото, препорачуваат спроведување на родова перспектива при креирање на општински програми во сите области.
Анеса Салиху
