Дебарскиот регион со априлска снежна покривка
По топлите денови, вчерашниот попладневен дожд и ветер во текот на ноќта дебарскиот регион го зафатија снежни врнежи. Дебелината на снежната покривка во пониските населени места е неколку сантиметри додека во повисоките таа е над 10-тина и повеќе сантиметри. Снег сеуште врне.
Освен убавината што со себе ја носи, снегот не создаде проблем во нормалното одвивање на патниот сообраќај. Сепак се препорачува внимателно возење поради влажни коловози и појава на помали одрони од камен.
-Сообраќајот се одвива непречено, но по влажни коловози, а на некои делови има остатоци од кашест снег, како и појава на помали одрони од камен. Нашите екипи се постојано на терен во расчистување и засега нема проблеми. Сепак препорачување внимателно возење и строго почитување на сообраќајната сигнализација, како поради влажниот коловоз, така и поради можноста од појава на одрони, препорачуваат од дебарската секција на „Македонија пат“.
Под надлежност на дебарската секција се делницата Дебар-Жировница, на патот кон Маврово, Дебар-Глобочица, кон Струга, патот Мелнички Мост – Центар Жупа, кракот од Бошков мост кон селата од Мала Река, како и патот кон граничниот премин „Блато“ или во вкупна должина од околу 120 километри.
Снегот секако е добредојден за зголемување на дотекот на вода во реките а со самото тоа и во акумулацијата „Шпилје“ (Дебарско Езеро)./MIA
