Овој ке биде првиот чекор на „Отворен Балкан“
Доцнењето на конкретното спроведување на ветувањата од иницијативата „Отворен Балкан“ ме разочаруваат, изјави српскиот претседател Александар Вучиќ, кој беше домаќин на средбата со албанскиот премиер Еди Рама и вицепремиерот за европски прашања Никола Димитров. Вучиќ најави дека трите балкански земји учеснички во „Отворен Балкан“ наскоро ќе формираат Совет за спроведување на иницијативата. За десетина дена посебна група ќе ги подготви можните олеснувања кои ќе се преточат во закони за послободно движење на стоки меѓу земјите. Страните ветија и слободно движење на граѓаните за релативно брз период.
„Затоа треба да имаме целосна контрола над сè, ќе работиме во сабота и недела, сите овие денови, бидејќи нашите економии зависат од тоа, ако можеме да дадеме најдобри резултати за нашите земјоделски производители, за нашите фабрики, за нашите вработени, за нашите компании. Се договоривме и за понатамошна соработка, бидејќи сакаме нашите луѓе за година или година и пол, да се движат без граница од Белград до Тирана, од Тирана до Скопје или од Тирана до Ниш . Никој никого да не запре на граница.“
Укинувањето на комплицираните бирократски процедури за купување недвижен имот во трите земји, меморандум за меѓусебно признавање на работните дозволи, како и слободното движење на странците како работна сила, се дел од следните чекори кои беа ветени. Албанскиот премиер Еди Рама веќе гледа одраз на позитивна енергија кај граѓаните од регионот како резултат на отворениот Балкан.
„Во последните осум месеци приливот на туристи во Албанија од Србија е зголемен за 63 насто, приливот на туристи во Албанија од Северна Македонија е зголемен за 22 насто. Тоа се бројки кои се директен резултат во економијата, освен во процесот на зголемување на позитивните енергии на Отворени Балкан во регионот, и убеден сум дека овие бројки само ќе се зголемуваат. Во декември во Тирана сме посветени да дадеме конкретни резултати и од јануари на границите на земјите да започнеме многу чувствително релаксирање за компаниите, дистрибутерите и земјоделците“.
Премиерот Заев го откажа учеството на оваа средба поради најава за оставка. Но, вицепремиерот Димитров рече дека и покрај домашните политички случувања, земјата останува посветена на добра регионална соработка.
Учесниците повторно поминаа многу време пред новинарите за да ја објаснат важноста и придобивките од приклучување кон оваа соработка. Трите земји учеснички велат дека иницијативата останува отворена и за другите земји од Западен Балкан. Косово, Црна Гора и Босна и Херцеговина одбија да бидат дел од Отворен Балкан.
Fatlume Dervishi
