„Исчистени“ од работа 33 Албанци од Комунална хигиена – Скопје
„Исчистени“ од работа 33 Албанци од Комунална хигиена – Скопје
Новоименуваната директорка на скопска Комунална хигиена Косана Мазнева отпушти 33 вработени, сите Албанци. Договорите не им беа продолжени. Тоа предизвика реакција кај овие вработени кои ја обвинуваат институцијата за одмаздата од политичка основа, а не поради неправилности во работењето. Велат дека си ја работеле работата и тоа се докажува преку евиденцијата, потписите и безбедносните камери, бидејќи, како што велат, намерно не им дале електронски картички за „чекирање“ на работа.
„Сакаме да ја информираме јавноста дека сите работни места ќе бидат пополнети со партиски милитанти по нашето заминување бидејќи тоа им беше целта. Според Законот за систематизација, Комунална хигиена има многу други слободни позиции, освен оние што останаа по нашето заминување, што значи дека образложението на директорот дека сме биле нередовни и непотребни, само ни отвора законски пат да си го побараме своето право“, се вели во писмото од отпуштените.
Отпуштените вработени се подготвуваат да поднесат кривична пријава. Од друга страна, „Комунална хигиена“ Скопје соопшти дека покренала дисциплинска мерка против нивната вработена Ана-Марија Бранѓолица која, според нив, претходниот ден го предизвикала инцидентот со новинарите.
„33лица вработени преку Агенцијата за привремени вработувања во Јавното претпријатие Комунална хигиена Скопје кои примале плата со месеци и години и не оделе на работа, по истекот на договорите, истите не им биле продолжени. Мора да ставиме крај на расипничкото трошење на парите на граѓаните и посветено да работиме на подобрување на услугите и исполнување на обврските кон граѓаните“, велат од ЈП „Комунална хигиена“ Скопје.
Градоначалничката на Скопје Данела Арсовска тврди дека во секоја локална институција има административци кои седат по 8 часа и не се продуктивни или воопшто не одат на работа и земаат плати. Арсовска вели дека наместо на Законот за правична и соодветна застапеност за вработување на другите етнички заедници, тие работат според методот на балансирање. Таа ги демантираше и поплаките на некои вработени дека немале соодветна опрема за работа.
Арсовска не сакаше да коментира колкав е процентот на вработени немакедонци во Град Скопје, но вети дека ќе ги преиспита договорите во сите претпријатија и дирекции. Таа бара моделот на реформи започнат во Комунална хигиена да продолжи во сите државни институции.
Аднан Ќаили
