Документот од АРМ за премиерот Ковачевски бил „воена тајна“
![](https://alsat.mk/mk/wp-content/uploads/2022/07/Ministerstvo-za-odbrana-780x470.jpg)
Министерството за одбрана ќе покрене постапка за објавениот документ од Регистарот на АРМ, кој вчера се споделуваше на социјалните мрежи, откако претходно ВМРО-ДПМНЕ обвини дека премиерот Димитар Ковачевски неосновано дезертирал. Од Министерството велат дека документот е со класифицирана содржина и ќе бараат одговорност за несовесно ракување и неовластено објавување.
„Документот кој е објавен на социјалните медиуми и презентиран од политичка партија, по првичната проверка претставува документ кој во документација на Министерството за одбрана и Армијата првично е заведен како документ со печат „воена тајна“, а подоцна по носењето на Законот за класифицирани информации, добива класификација „строго доверливо“, наведуваа од Министерството за одбрана.
Од Министерството повикаа политичките партии и поединците, во обид да придобијат политички поени, да не поттикнуваат извршување кривични дела.
Од друга страна, пратеникот на ВМРО-ДПМНЕ Драган Ковачки, денеска продолжи со обвинувањата на адреса на премиерот и побара негова оставка.
„Дека премиерот дезертер Ковачевски е неспособен потврдија и од Министерството за одбрана, кои го потврдија документот објавен на социјалните мрежи, од кој јасно се чита дека премиерот е трајно неспособен“, рече Ковачки.
Социјалдемократите вратија со иста мера – дека дезертер всушност бил Ковачки.
„Мицкоски го одбрал Ковачки за пласирање на невистини и манипулации… Единствен воен дезертер на политичката сцена е Драган Ковачки. Ковачки беше полковник во АРМ, но политички дезертираше и ја напушти Армијата за да му слугува на Мицкоски како пратеник…“, наведуваат од СДСМ.
Инаку, по вчерашните обвинувања од ВМРО-ДПМНЕ, премиерот Ковачевски одговори дека здравствениот статус кој му бил даден бил резултат на хируршка интервенција од пред 20 години.
Лука Андреев