Стартува грејната сезона, Бектеши и Ковачевски уверуваат струја ќе има доволно од домашните капацитети
Грејната сезона во Скопје за поголемиот број граѓани приклучени на мрежата за централно греење започна денеска со исти услови како и претходно, откако „Електрани“ на Северна Македонија ги доби потребните лиценци за производство, дистрибуција и снабдување со топлинска енергија, уверува министерот за економија Крешник Бектеши.
Премиерот Димитар Ковачевски изјави дека земјава во споредба со другите од регион е прва која што пуштила парно греење за граѓаните, додека во соседството се носат одлуки за неколку дневно одложување на грејната сезона.
Бектеши денеска изјави дека граѓаните ќе добиваат топлинска енергија непречено до крајот на грејната сезона, како и дека потрошувачите на електрична енергија кои се на регулираниот пазар како што се домаќинствата ќе добиваат струја од домашните капацитети, за што, како што истакна веќе се направени сите неопходни подготовки.
