Венее „Зелената агенда“ на ДУИ
„Денес загрозувањето на зелената агенда и загадувањето на животната средина е закана за безбедноста, исто како и корупцијата и организираниот криминал. Затоа, Владата, општините и сите наши институции мора да се приклучат и ќе се посветиме на тоа да станеме регионален и европски лидер во политиките на зелената агенда“, рече претседателот на ДУИ, Али Ахмети.
Повеќе од година и пол од денот кога лидерот на ДУИ на граѓаните им ја откри екологијата како приоритет на оваа партија. Но, на крајот, во разговорите за проширување на Владата со Алијанса за Албанците, токму Министерството за екологија беше понудено на сребрен послужавник. Ресорот со кој неодамна раководеше Насер Нуредини од ДУИ, ќе премине кај СДСМ, односно во рацете на Каја Шукова.
Ова доведе до критики од страна на „Огнената група“ во ДУИ кои оваа постапка ја сметаат за повлекување на ДУИ од Зелената агенда, со која се тркаа и ги добија гласовите на граѓаните на последните локални избори. Според Изет Меџити, ова е уште еден неуспех во листата на ДУИ.
„ДУИ не треба повеќе да толерира вакви измами. Вчера да каже – правиме зелена агенда, а денеска го даваме Министерството за екологија. Каде е тука политичката логика? Тоа беше едно од главните ветувања и кога дојде момент да ги дадеме министерствата, првото што го даваме е Министерството за екологија. Тие заборавија на зелената агенда. ДУИ не се реформира со менување на ова знаме. ДУИ ќе се реформира кога ќе си замине Артан Груби заедно со другите Артановци“, рече Меџити.
Во својот говор пред граѓаните на 5 јуни 2021 година, Ахмети со носталгија зборуваше за времето кога можело да се пие вода од реките во земјава и рече дека целта на ДУИ била повеќе да нема диви депонии, но низ целата држава многу реки и натаму се загадени, а диви депонии има насекаде. Една од оние општини кои се соочуваат со овие проблеми е Сарај. Градоначалникот Блерим Беџети ја обвини Владата за недостигот на капитални инвестиции во оваа општина. Тој рече дека членовите на ДУИ во извршната власт внесуваат поделби во партијата.
„Во отсуство на фискална децентрализација, во отсуство на децентрализација во другите области, свесни сте и ме разбирате за недостигот на инвестиции, за овој период по новата Влада. Доста е со грешки и обиди за личен протагонизам“, рече Беџети.
Од општина Сарај, Невзат Бејта му ја пренесе пораката на Артан Груби дека „Огнената група“ не е поделена, бидејќи според Бејта, Груби тоа се обидува да го претстави преку порталите на своите луѓе.
„Артан Груби се обидува да наштети преку своите нарачатели, преку портали, наводно дека сме поделени. Обединети сме и еве нè под водство на вашиот градоначалник, Блерим Беџети“, рече Бејта.
Еви Шкопи
