Арсовска без одговор за членовите на комисијата за филтер-станицата за Вардар
И покрај тоа што се судри со ВМРО-ДПМНЕ за промена на членовите на комисијата за проценка на тендерот за пречистителната станица на реката Вардар и ги отпушти директорот на Водовод Златко Перински, градоначалничката на Скопје, Данела Арсовска, две недели подоцна го избегна одговорот дали ќе ги смени членовите на оваа комисија?
Го прашавме сегашниот директор Марјанче Митовски дали го прифаќа барањето од градоначалничката за смена на двајцата членови на Градот во комисијата. Тој кратко одговори:
„Во Јавното претпријатие „Водовод и канализација“ во Скопје нема решение одобрено од в.д. директорот за промена на членовите на Комисијата“, рече Митовски.
Арсовска, на почетокот на месецот го разреши директорот на „Водовод“, Златко Перински, член на ВМРО-ДПМНЕ, кој, според неа, не дозволил двајца членови на оваа комисија да бидат сменети со други, наведувајќи дека тоа ќе го одложи или загрози тендерот од 136 милиони евра од Европската инвестициска банка, за изградба на пречистителна станица за отпадни води. Перински дури и ги презентираше препораките на Банката да не се прават вакви промени, бидејќи комисијата работела по сите стандарди.
Но, Арсовска тогаш го обвини Перински дека преку двајцата членови кои го претставуваат градот сака да направи злоупотреба. Поради несогласувањата кои настанаа меѓу Арсовска и ВМРО-ДПМНЕ, сите директори од оваа партија поднесоа оставки.
Мефаил Исмаили
