Блокирана работата на седум собраниски комисии
Ниту овој понеделник, по вообичаената координација на пратеничките групи со претседателот на Собранието Талат Џафери, немаше договор за деблокирање на работата во собраниските комисии кои ги блокираат процедурите и на пленарните седници. Околу седум комисии се речиси нефункционални. Тоа е така поради тоа што некои пратеници по локалните избори преминаа од Собранието во локалната власт, а имаше и менување на партиите од власта. Беса отиде во позицијата, а на власт дојде Алтернатива. Така, составот на комисиите не ја отсликува новата ситуација власт-опозиција. Власта веќе нема мнозинство во некои комисии. СДСМ признава дека постои проблем. Ја обвинува опозицијата за намерно блокирање.
„Не дека нема волја или напор од пратениците на власт, туку тоа е резултат на сето она што го прават пратениците на ВМРО-ДПМНЕ и нивната коалиција, опструкции, забавување на процесите, блокирање на законите. кои треба да се одобрат., кои долго време се во собраниска процедура. Секако дека не е потребна лидерска средба. Ова е законодавен дом и тука се претставниците на народот и наша обврска е преку дијалог да дојдеме до заеднички решенија“, рече Снежана Калеска Ванчева, СДСМ.
Но, од ВМРО не ги прифаќаат ваквите обвинувања и топката ја префрлаат кај власта.
„ВМРО-ДПМНЕ се што работи во Собранието е за доброто на граѓаните. Она што не може да го договорат коалицијата СДСМ-ДУИ е нивен проблем. Ние тука не се мешаме. „Во парламентарна држава жално е што Собранието функционира толку ретко, но ова веројатно не е одраз на работата на Собранието, иако овде повторно е виновен двоецот СДСМ-ДУИ, ова е одраз на непостапувањето на Влада во нашата држава“, изјави Димче Арсовски, ВМРО-ДПМНЕ.
Комисијата за избори и именувања го дефинира составот на другите комисии во Собранието со избор на нивните членови и претседатели. Но, таа комисија не функционира со месеци, од заминувањето на нејзиниот поранешен претседател, Костадин Костадинов, кој стана градоначалник на Струмица. Од власта велат дека и по изборот на новиот претседател на комисијата, мнозинството го сочинува пратеникот Фадил Зендели, кој во моментов е дел од опозицијата. Зендели вели дека нема намера да биде неконструктивен и нема да се повлече од функцијата, туку ќе гласа по свое убедување.
„Претседателот на Собранието може во секое време да свика седница. Јас како пратеник, се надевам дека и останатите пратеници кои се членови на оваа комисија, се подготвени да дадат свој придонес. Во ниту еден момент, а се надевам дека и за другите колеги нема да бидам пречка во функционирањето на оваа комисија. Пречка се тие кои не свикуваат комисија и не даваат можност ние како пратеници да ги соопштиме нашите ставови“, изјави Фадил Зендели, движење Беса
Овој судир во Собранието, освен што остава без претседатели и членови неколку собраниски комисии, доведува до ситуација да не можат да се изберат и нови четворицата судии во Уставниот суд, кој во моментов функционира само со пет од вкупно девет судии.
Собранието во последниве два месеца почна само три нови седници, а од неговото конституирање во летото 2020 година има вкупно 20 незавршени пленарни седници. /Алсат.мк
Фатлуме Дервиши
