Велика Британија се огради од предлогот на францускиот претседател Емануел Макрон за ограничено првично едномесечно примирје меѓу Русија и Украина, додека Киев изрази резерви за прекин на борбите без безбедносни гаранции, пишува Financial Times.
Разликите се појавија по ревијалниот самит во Лондон на кој најголемите европски сили се обидоа да проектираат единство и да развијат заеднички план по катастрофалниот состанок во Белата куќа меѓу претседателите на САД, Доналд Трамп и Володимир Зеленски од Украина.
Макрон по самитот во неделата рече дека со неговата идеја за ограничен, едномесечен прекин на огнот „од воздух, од море и на енергетската инфраструктура“, Русија ќе имала можност да ги потврди намерите за мир.
-Францускиот претседател има досие за променливи политички идеи за притискање на сојузниците кон договор, коментира Financial Times.
Сепак, Велика Британија, која беше домаќин на самитот, излезе со став дека премиерот Кир Стармер сака да продолжи со мировниот план, со одредена динамика. Но, од неговиот тим нагласија дека едномесечно примирје не е „план на Обединетото Кралство“.
Еден британски претставник рече: „Има различни опции на маса, предмет на понатамошни разговори со американските и европските партнери, но едномесечното примирје не е договорено“.
Министерот за вооружени сили на Обединетото Кралство, Лук Полард, предупреди дека пауза во борбите во Украина би можело да ѝ овозможи на Русија да се прегрупира.
Тој изјави за Скај њуз: „Вистинската загриженост што ја имаат Украинците е дека секоја кратка пауза во војната едноставно им дава на Русите време повторно да се вооружат, да се регрупираат и повторно да нападнат“.
Зеленски, исто така, ги отфрли повиците Украина да се договори за итен прекин на огнот во војната со Русија. При заминувањето од Обединетото Кралство од самитот, тој рече дека ќе биде „неуспех за сите“ доколку прекинот на непријателствата не биде придружен со детални безбедносни гаранции.
Тој одби да го коментира предлогот на Макрон.
