Бучковски е во Софија, нашата Влада молчи, а Каракачанов вели дека имаме „див менталитет“
Специјалниот пратеник на С. Македонија, Владо Бучковски, повторно замина за Софија. Но, информацијата ја објавија бугарските медиуми, а сè уште не е официјално потврдена од институциите во нашата земја. Во пресрет на пристигнувањето на специјалниот пратеник во Софија, бугарскиот министер за одбрана, Красимир Каракачанов, за тамошните медиуми изјави дека Бучковски има добра волја да најде заеднички јазик, но не и оние што го испратиле во Софија.
„Бучковски е човек со добри намери и политичко искуство и не случајно е избран за такви разговори, но мислам дека владата во Скопје го користи. Тие едноставно го користат за да демонстрираат добра волја. Тој има добра волја, но мислам дека таква волја нема кај оние што го испратиле. Бидејќи, три и пол години тие не сторија ништо и сега се надеваат на компромис од бугарска страна. Таму постои див менталитет од 19 век и не гледам причина да очекувам напредок.“
Нема информации од Министерството за надворешни работи за агендата на Бучковски, ниту пак каков епилог очекува од разговорите. Што точно содржи Анексот со 12 точки за решавање на прашањето, составен од Бугарија, од Министерството за надворешни работи и од Владата во Скопје и денеска не сакаа да коментираат. Реагираа од опозициската ВМРО-ДПМНЕ од каде обвинија дека СДСМ продолжува бесрамно да ги лаже граѓаните и да преговара за македонскиот идентитет и историја. Притоа потсетуваат дека како опозициска партија алармирале за содржината на анексот уште пред неколку месеци.
А, дипломатот и поранешен амбасадор на САД во Софија, Џејмс Пердју, во интервју за бугарски медиуми, рече дека Софија треба да ја поддржи, а да не ја блокира кандидатурата на Македонија во Европската унија.
Evi Shkopi
