Претседателката на бугарското Национално собрание, Наталија Киселова, која претходно беше советник на претседателот, му го врати на претседателот Румен Радев предлогот за референдум за воведување на еврото.
Овој потег значи дека бугарскиот парламент нема да го разгледува предлогот на Радев за организирање на гласање за предлогот за усвојување на еврото од 2026 година. Со ваквата одлука се елиминира можноста претседателот да се обрати до Уставниот суд, бидејќи, како што се наведува, без одлука од страна на законодавниот дом, нема што да се достави до Судот.
Според соопштението од прес-службата на Националното собрание, предлогот за референдум е вратен бидејќи е оценет како недозволив.
Во образложението на Киселова се тврди дека предлогот е во спротивност со Уставот, Договорот за функционирање на Европската Унија, Договорот за пристапување на Република Бугарија кон ЕУ и Законот за непосредно учество на граѓаните во државната власт и локалната самоуправа. Исто така, во образложението се посочува дека предлогот на претседателот и неговите аргументи не се во согласност со пресудата на Уставниот суд по иницијативата на „Преродба“ за референдум за прашањето за еврото.
Во меѓувреме, премиерот Росен Желјазков и гувернерот на Бугарската народна банка, Димитар Радев, потпишаа документ со кој ја изразија својата поддршка за воведување на еврото во Бугарија од 1 јануари 2026 година.
