Деаноски: Не отстапуваме од барањето за покачување на минималната плата на 450 евра
Нема да отстапиме од барањето за покачување на минималната плата на 450 евра, бидејќи тоа е прагот под кој не смее да се отиде. Плата во висина од 450 евра не треба да добие никој од вработените во јавниот и приватниот сектор, тоа е социјална помош која државата ја дава на вработените, истакна денеска на прес-конференција претседателот на Синдикатот на УПОЗ, Трпе Деаноски.
Како пример, Деаноски ја посочи Босна и Херцеговина која неодамна ја покачи минималната плата на 600 евра.
-Барањето 450 евра останува на маса, тоа е наше барање, не е истакнато сега, истакнато е уште пред неколку години. Гледаме дека во сите држави во регионот се зголемува минималната плата, како што видовте БиХ ја зголеми на 600 евра. Ако може БиХ зошто ние не можеме да го следиме нивниот пример. Тие многу едноставно го направија тоа преку она што се вели трошоци за храна и превоз. Ние како Синдикат на УПОЗ со години наназад најавуваме дека храната и превозот не е додаток, ниту надомест на плата и дека веќе никој не знае колку добиваме ние за храна и за превоз. Остана на една сума од 2009 година на 2.600 денари и тоа баш на цени за превоз и храна од 2009 година. Инфлацијата од 2009 до сега порасна на над 40 отсто, а цените останаа исти, рече Деаноски.
