Димитров – Лииметс: ЕУ да го исполни ветеното и да ги отвори преговорите со С Македонија
Заменик претседателот на Владата задолжен за европски прашања Никола Димитров, работната посета на Естонија, ја почна изутрината во Талин со средба со министерката за надворешни работи Ева-Мариа Лииметс.
Димитров и Лииметс разговараа за клучните аспекти од европското досие на Северна Македонија со фокус на изгледите за што побрз пробив на евроинтегративниот пат, за што Естонија конзистентно изразува поддршка, соопшти СЕП.
-Естонската приказна е многу успешна и Северна Македонија може и треба многу да научи од пријателска Естонија. Естонија е пример за тоа како една земја може да се развие и напредува, искористувајќи ги сите расположливи капацитети. Денес, во Талин, од мојата колешка Ева-Марија уште еднаш добив уверување дека Естонија ќе продолжи безрезервно да не’ поддржува во процесот на европеизација на нашето општество, истакна Димитров на средбата со Лииметс.
Министерката Лииметс ја реафирмираше принципиелната поддршка за европската иднина на нашата земја и спремноста за споделување на успешното естонско евроинтегративно искуство. Таа нагласи дека е неопходно Европската Унија доследно да ја примени новата Методологија за пристапување и да ги разгледа сите можности за што поскоро да се одржи првата меѓувладина конференција со Северна Македонија.
