Долги редици пред банките за државна помош за ученици
И денеска гужви и долги чекања пред шалтерите на банките каде многу граѓани бараат документи за социјални стипендии за ученици. Родителите со кои зборувавме ни рекоа дека ваквиот хаос е повреда на достоинството и исмејување со учениците.
„Ова не е нормално, но што да правиме, сиромаштијата нè принудува, немаме приходи, ова е потсмевање со луѓето, но немаме што да правиме.“
„Воопшто не е нормално, тука ништо не е нормално, погледнете како чекаат луѓето. Ова е дело на државата на Али Ахмети“, реагираат родителите.
До вчера во Заводот за социјални работи и во банките имаше хаос со родители кои се обидуваа да ги обезбедат потребните документи за социјални стипендии, а од денес овој хаос продолжува и во училиштата. Вработените во училиштата кои ги добиваат документите велат дека тоа им одзема време, принудувајќи ги да работат често до 10 часот навечер, а им одзема време и за административните работи што треба да ги направат за училиштата.
„Навистина е заморно верувајте. Веќе сум повлечена од образовниот процес бидејќи чувствувам морална обврска да им помогнам на учениците, иако тоа е мала солидарна помош. Отсуствуваме бидејќи сите сме во процесот и навистина има застој со административната работа. Јас како педагог сега на крајот на полгодието треба да се занимавам со педагошка евиденција, но верувам дека ќе успееме“, рече Астрит Абдулаи, педагог во гимназијата „Кирил Пејчиновиќ“.
„Една недела пред крајот на полугодието се објавува вест за социјални стипендии, за категории со примања под 50.000 денари, ова е тотален дефокус од учењето и поигрување со оваа категорија семејства со пониски примања. Сепак, ова е силен показател за степенот до кој семејствата и општеството се социјално деградирани како резултат на погрешни економски политики“, рече Биназ Пајазити, директор на средното медицинско училиште „Никола Штејн“.
Реагираше и опозицијата. Движењето БЕСА овој акт на Министерството за образование го нарече исмејување со населението.
„Министерството за образование и неговиот пропаднат министер Јетон Шаќири треба заедно со нивниот шеф Артан, да одговорат зошто оваа финансиска помош за учениците доаѓа токму во пресрет на изборите, точно шест месеци и само до завршување на изборниот процес? Зошто министерството не ги одвои овие пари за да обезбеди книги за учениците, за да можат правилно да го следат образовниот процес, а не да ги замајуваат, наводно за да им помогнат финансиски, а од друга страна, не е во можност да обезбеди книги за овие ученици“, рекоа од БЕСА.
Според владината одлука, парична помош од 1.200 денари ќе им биде исплатена на сите учениците од основното и по 1.800 денари на учениците од средното образование чии родители имаат вкупни месечни приходи до 50 илјади денари. Крајниот рок за аплицирање е понеделник.
Башким Сулејмани
