Ракометен суперлигаш Алкалоид ги започнува настапите во Европа. Тимот предводен од Кирил Лазаров оваа сезона ќе игра во ЕХФ Купот, каде тргнува од второто коло и против себе има ривал од Литванија.
Драгунас Клаипеда е првата пречка за „сините“ од Автокоманда, во втората европска сезона во историјата. По ланскиот настап во Европската лига на ЕХФ, каде ја забележа првата европска победа и ги освои првите бодови со шпанска Ла Риоха, клупското раководство реши да го пријави клубот во третото по ранг натпреварување на ЕХФ.
Инаку, Драгунас Клаипеда е тим кој игра на висок број на постигнати голови, а во своите редови има тренер од Шпанија, кого го донесе оваа сезона. Се работи за екипа составена од неколку странски имиња, како и литвански репрезентативци. Алкалоид ја има фаворитската улога на првиот натпревар, но тренерот Лазаров најави дека нема да се лета во облаци, туку ќе се остане цврсто сталожен на земја и ќе се стреми на победа со паметна игра пред реваншот во Клаипеда.
Ќе ги има Алкалоид сите планирани играчи на располагање, а во европскиот дуел влегува во одлична форма – има седум победи на седум натпревари во Суперлигата и е единствениот тим со максимален учинок во Македонија. Натпреварот меѓу Алкалоид и Драгунас Клаипеда стартува од 19:00 часот во салата „Автокоманда“ во Скопје.
