ДЗР изрази неповолно мислење за објективноста на финансиските извештаи на МТСП
Државниот завод за ревизија (ДЗР) изрази неповолно мислење во однос на вистинитоста и објективноста на финансиските извештаи на Министерството за труд и социјална политика (МТСП) и мислење со резерва во врска со усогласеноста на финансиските трансакции со релевантната законска регулатива за 2021 година.
Ваквото мислење на ДЗР следува по направената ревизија на финансиските извештаи во Министерството и ревизија на усогласеност на сметката со основниот буџет за 2021 година.
ДЗР препорачува воспоставување повремени контроли при носење на решение од страна центрите за социјална работа, да се уреди начинот на критериумите за избор, потребните квалификации, правото и висината на надоместокот на Комисиите и да се спроведе целосен попис и евидентирање на целокупната опрема која не е евидентирана.
Како клучни системски слабости, пак, се истакнуваат средствата остварени од приредувањето на игри на среќа и забавните игри кои Владата ги распределува врз основа на програма поднесена од страна на МТСП, како и непостоење на критериуми и начин на утврдување на висината за остварување на право на додаток на плата на ангажираноста на административниот кабинетски службеник.