ЕУ против „Астра Зенека“: Компанијата не се ни потруди да го исполни договорот за вакцини
Европската унија денеска ја обвини „Астра Зенека“ пред судот дека дури не се обидела да го исполни склучениот договор за испорака на вакцини против ковид-19 и дека не предупредила навреме дека ќе има големи прекини во испораките.
ЕУ поднесе тужба против „Астра Зенека“ во април, откако компанијата објави дека ќе се обиде да испорача само 100 милиони дози од својата вакцина до крајот на јуни, наместо 300 милиони предвидени со договорот за набавка, и побара испорака на најмалку 120 милиони вакцини до крајот на јуни.
Компанијата, пак, тврди дека договорот не е целосно обврзувачки и дека со него се бара само да вложи најдобри можни напори за испорака на потребните вакцини до Унијата.
Адвокатот на ЕУ, Рафаел Џаферали, денеска на првото рочиште пред судот во Брисел, рече дека овој принцип не е почитуван затоа што компанијата не испорачала 50 милиони дози произведени во фабрики што се наведени во договорот како добавувачи во ЕУ, вклучувајќи 39 милиони произведени дози во Британија.
„Астра Зенека“, пак, го оправдува недостатокот на залихи во Велика Британија со клаузули од нејзините британски договори кои спречуваат извоз на вакцината што ја разви со Универзитетот во Оксфорд. Џаферали рече дека „Астра Зенека“ се обврзала во договорот со ЕУ дека нема да има други ангажмани што би ја спречиле да се придржува кон условите на договорот.
