Европскиот Парламент од денеска (29 април) започнува кампања за поттикнување на граѓаните на ЕУ да учествуваат на Евроизборите закажани за 6 до 9 јуни годинава, чија примарна цел е да се зголеми одзивот на гласачите.
Идејата на кампањата е да се пренесе пораката: „Користете го вашиот глас, не дозволувајте толку лесно да ви биде одземена демократијата. Таа е дадена, вие треба да ја браните“.
Почнувајќи од првите директни избори за европратеници во 1979 година кога одзивот беше 61,99 отсто, тој беше во опаѓање на секое следно гласање, паѓајќи под 50 проценти на сите избори по 1999 година, за да ја достигне најмалата излезност од 42,61 отсто во 2014 година. На последните избори за членови на Европарламентот во 2019 година, во сенка на Брегзитот, одзивот беше 50,62 проценти.
