Фудбалската федерација на Македонија им донира, а веќе е започната распределбата на вкупно 13.800 фудбалски топки (FIFA QUALITY PRO “IMS – International Match Standard”) на клубовите од сите категории од натпреварувањата во рамки на ФФМ (ПМФЛ, ВМФЛ, Трети лиги, младински конкуренции, Женска фудбалска лига, футсал натпреварувања и Национални тимови).
За 12 клубови од ПМФЛ се распределуваат 600 фудбалски топки (Triton – FIFA), a 16 клубови од ВМФЛ ќе добијат вкупно 640 фудбалски топки. 18 клубови од Женската лига (Прва и Втора) ќе добијат 560 фудбалски топки (Reposta).
7040 фудбалски топки (Mission IMS) се наменети за клубовите од Трета лига, лигите организирани од Општинските фудбалски Сојузи и младинските конкуренции. Eкипите од ФФМ Детска лига ќе добијат вкупно 3000 фудбалски топки. 200 топки се наменети за тимовите од Прва и Втора футсал лига. Останатите ќе бидат на располагање за сите наши Национални тимови.
„Со новата акција наменета за клубовите од МФЛ и нашите национални тимови, Управниот одбор на Фудбалската федерација на Македонија ја потврдува важноста за поддршка на сите клубови во сите конкуренции од натпреварувањата организирани од ФФМ. Ќе се обидеме и во иднина да им ја дадеме целосната поддршка и помош на клубовите кои придонесуваат за развој на фудбалот во Македонија“, вели првиот човек на ФФМ, Сејдини.
Фудбалските топки произведени по највисоките стандарди на ФИФА се со дизајн на ФФМ./Gol/
