Филипче и Битиќи се новите потпретседатели на СДСМ
Сите четворица нови и старо-нови потпретседатели на СДСМ се членови на Владата: Вицепремиерот за економија Фатмир Битиќи и министерот за здравство Венко Филипче се нови имиња за потпретседатели, додека од досегашните носители на оваа партиска функција позициите ги задржаа министерката за образование Мила Царовска и министерот за внатрешни работи Оливер Спасовски.
СДСМ и во последните две години имаше четворица потпретседатели, но на овие функции веќе не се Коста Петров (директорот на Фондот за иновации) и Мухамед Зекири, кој во меѓувреме стана генерален-секретар на Владата, а сега останува и член на Извршниот одбор.
СДСМ доби денеска и нова заменик-претседателка – Сања Лукаревска, покрај новите состави на Централниот и на Надзорниот одбор, кои беа избрани на 26.конгрес.
По конгресот, новиот ЦО веднаш одржа седница на која избра нов состав на Извршниот одбор, но и нов организациски секретар – Мартин Попов, додека Љупчо Николовски е реизбран за генерален секретар.
