Филипче: Никој не смее да биде поштеден, ниту актуелни ниту поранешни функционери
Претседателот на СДСМ, Венко Филипче на прес-конференција апелираше до истражните органи редовно да известуваат за тоа што точно се прави за да се спречат шпекулации. Тој нагласи дека никој не смее да биде поштеден во овој случај во кој загинаа 59 луѓе.
„Ние денеска сме рането општество. Довербата во институциите е срозена и ако сакаме да ја вратиме мора да има целосна и објективна истрага никој не смее да биде поштеден, ниту актуелни ниту поранешни функционери ниту службеници. Тоа не е прашање на политика туку прашање на вистина и правда. Трагедијата е преголема да се дозволи сенка на сомнеж. Затоа апелирам до истражните органи редовно да се известува за тоа што точно се прави и да се спречат шпекулации. Потребна е одговорност од сите како граѓани, потребно ние единство, ова не е време за политички пресметки. Треба да покажеме човечност“ рече Филипче.
Тој вети дека нема да дозволи политизирање на овој процес и нема да дозволи некој да биде поштеден. Понуди помош на целиот капацитет на партијата – човечки и интелектуален.
„Ова е ситуација кога мораме сите да сме сплотени. Секој акт на морална одговорност од наша страна ќе биде поздравен“ рече Филипче.
