На околу 140 здравствени работници со договор на дело им е ветено продолжување на договорите до април следната година. Министерот за здравство Венко Филипче утринава на средба примил дел од нив и ги информирал дека нивниот работен однос директно зависи од Министерството за финансии и дека Министерството за здравство нема ингеренции во овој поглед.
Пред две години како патронажни работници беа ангажирани околу 140 здравствени работници, а по прогласување на пандемијата работеа секаде каде што имаше потреба. Повеќето од нив биле во директен контакт со заразени со Ковид 19, а нивните договори важат до 31 декември. Првиот човек на здравството рече дека нивната посветеност е многу неопходна за здравствениот систем во земјава.
Ветувањето на Министерството за здравство, за продолжување на договорите доаѓа неколку дена откако поголем дел од здравствените работници се собраа пред Министерството за здравство, за да побараат објаснување што ќе биде со нивната судбина барајќи решение за статусот, бидејќи нивниот ангажман со договор на дело не им го покрива здравственото осигурување или стажот. Иако испративме прашања до Министерството за финансии, оттаму не одговрија.
